محتاجه الحنان

انا سارة حبيت ارسلكم يا نوافذ امل انا عندي مشكله مع زوجي طبع المرأة تحب الجمال والثناء وتحب الاهتمام وانا افقد ذلك للاسف.

اقولكم كيف ؟ انس زوجي اهملني وما بهتم فيني واذا لبست وزينت حالي ما بعجبه.

يعني انا انسانه ما استغني عن الكريمات واللوشنات وضعي مثل كل البنات.

اذا دخل وشافني بحط على وجهي كريمات او مكياج بحكيلي انتي ما بتعرفي اني ما بحب هالقصص.

صرت انجبر احط كريمات طبية عشان اذا حطيتها ما يكون في ريحة لاني بعاني من الجفاف وما بقدر ما احط كريمات .

واذا تعطرت بحكيلي بحس ريحة العطر بتخنقني لا تحطي عطر بعد اليوم مع انه عطوري مش ثقيلة وبختار الروائح الناعمه المشكلة بذم الريحة اذا تعطرت ، اكتشفت انه بدون علمي بشيل العطور وبحطها بالسيارة وبتعطر منها.

واذا حطيت مكياج بحكيلي كانك حاطه تراب على وجهك وانا كلشي بحطه خفيف .

اذا حكتله اهتم فيني بحكيلي النسوان همه يلي يدلعو الرجال وانا ما عمري شفت رجال بدلع مرته.

والله بس ابعتله رسائل حب و اغاني على الواتساب ما برد ولا بكلمة واحدة وحجته انا بحب هاي القصص، وانا بحكيله محتاجه اسمع منك لو كلمة وحده حلوة بس ما في فايده ابدا .

ما ببالغ لو حكتلكم صايبني اكتئاب صرت اكره وجوده واذا صار الليل بنيم اولادي وبنام معهم من غير ما استناه على التخت .

على فكرة انا لسا صغيرة عمري بالعشرينات نفسي اطلع معاه مثل باقي البنات معً ازواجهم بدي حدا يهتم فيني.

بدي بس اطلع معاه ما يجرحني لانه اذا اخدني مشوار بصير يصرخ علي ويبهدلني ويغلط بكلام كبير ومش قادره اضل اتحمل .

احكولي شو اعمل ؟ انا حاسه انه صار بينا فجوة كتير كبيره ولا صايره اطيقو ولا الي نفس احكي معاه وهو صاير يحكي معي بنفسية وانا بطلت اصلا متل اول .

ولا حد يحكيلي انه انفصل عنه عندي اولاد وفكرة الانفصال مش ببالي .

انا بفكر احب واحد ثاني واملئ الفراغ يلي بقلبي هو يلي وصلني لهون ببروده واهماله الي .

انصحوني شو اعمل ؟؟

رأي الباحث الاجتماعي:

مشكلتك بسيطه عدلي حالك مثل ما بحب زوجك اذا ما بحب المكياج لا تحطي واذا حطيتي حطي اخف بكثير من يلي بتحطي ابحثي عن يلي هو بحبه بذكائك وبفطنتك وطبقي ، اعرفي اي نوع من الرجال زوجك وشوفي الاسلوب الافضل للتعامل معه، لا بد من التنازلات للأخذ والعطاء، لا تبالغي بالامور لدرجه انه يكون هاجس يشغل تفكيرك ليل نهار .

اما بالنسبة انك تبحثي على واحد يملئ الفراغ فهذه تعتبر خيانة لزوجك عالجي مشكلتك وكلشي رح يتصلح وينحل.

اريد

انس عمري 21 سنة طالب جامعي بالسنة الثالثة قبل 11سنة احد ابناء منطقتنا استدرجني لمكان وتحرش فيني جنسياً.

كبرت والموضوع اثر فيني كثير وخلاني شخص انطوائي ودايما قاعد لحالي وما بحكي مع حد وما عندي صحبة وانعدمت ثقتي بنفسي لعدة سنوات الان خلصت من الموضوع ورجعتلي شخصيتي ، ولكن ما عمري ما رح انسا يلي عمله فيني.

الشخص يلي تحرش فيني اكبر مني ب 7 سنوات اكتشفت انه متزوج وعنده ولد عمره 4 سنوات.

بدأت الأحقاد ترجع وتذكرت كيف لمدة 8 سنوات من حياتي ضاعت بسبب ضعف الثقه بالنفس والخوف والأعراض النفسيه يلي صارت بسبب هالموضوع .

صار هدفي بالحياة كيف انتقم وأخليه يعاني.

انا رح انتقم منه بكل تاكيد وما رح يوقفني اي شي عنه لانه هذه الطريقة الوحيدة يلي رح تخلني انسا الموضوع وارتاح.

عمري ما فكرت أنتقم بابنه واعمل معه مثل ما عمل فيني اعوذ بالله .

لكن ما رح انسا الموضوع الا ما انتقم منه،

أتمنى تنصحوني قبل ما ارتكب شيء اندم عليه.

رأي الباحث الاجتماعي :

انس الانتقام بخليك شخص حقود ورح تصير تنظر للناس بالغيط ولو انكشفت بانتقامك رح تصير بنظر الناس انت الغلطان انت الان رجل وقادر على الانتقام بكل تاكيد ولكن العفو عند المقدرة بخليك إنسان على رقي ومكانه راقيه من انه تقوم بالانتقام .

ومن الناحية الدنية قال تعالى: {وَسَارِعُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ (133) الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ (134)} سورة آل عمران

تذكر اجر الكاظمين الغيظ والعافين عن الناس جنة عرضها السماوات والأرض ، كما ذكرنا الان انت رجل بالغ قادرعلى الانتقام وبيدك العفو مو بيد اي احد غيرك.

ننتظر رأي القراء

زوج اختي

انا سارة عندي مشكله كبيره كثير وهي زوج اختي برسلي مسجات قصائد وأغاني بعد زواجي بستة اشهر بعد ما عرفت انه زوج اختي ما حكيت لحد من اهلي ولا لزوجي .

حكيت لا اختي وتفاجأت انا انه كان يحكي لا اختي انا بحب اختك وما بعرف كيف عرفت انه إنسان وقح وقليل أدب وحكتلي انه ما اخبر حد .

زوجي بعد فتره شاف مسجات على الواتس من رقم غريب وانا ما حكتله انه زوج اختي ونصدم وجن جنونه وحكتله ما بعرف الرقم بس بضلي يبعتلي مسجات وانا رحت عملت بلوك لرقمه.

وانا من الأساس ساكنة بعيد عن اهلي وأختي فكان من السهل انه ما أشوفهم.

بعد سنتين انا وزوجي سكنا بنفس منطقة اهلي وقريب من بيت اختي وما قدرت اصبر وصرت ازور اختي لانه كنت ازهق كتير وانا كنت احاول أنسى الموضوع عشان ما ازعل اختي ولا اذكرها بالموضوع.

كنت اسألها عن وضعها مع جوزها كانت تحكيلي عادي هي حياة وبتمشي وما في بينا مشاكل .

انا ارتحت وصار جوزها يعزم جوزي وعلاقتهم شكلها منيحه مع بعض على بالي الأمور تغيرت وانه على بالي زوج اختي منحرج من تصرفاتو وهاد يلي خلاني احكي مشكلتي انه لحد الان مستمر بوقاحة بمرقابتي ومراقبة زوجي وحياتنا الشخصية واذا صار مشكله بينا وبين زوجي ينبسط ويحاول يزود المشكله .

انا الان ندمانه اني رجعت شوفت اختي لانه طلع مش ناسيني والقصة القديمة لساتو متعلق فيها وحاقد وغيور.

مقهوره وزعلانه انه زوجي وهو علاقتهم منيحه مع بعض وصحبه، وعم أحسه يستغل جوزي ويسأله اساله خاصه وجوزي على نياته، اخر مره انتبه منه على فكرة بغار منك ويحاول يسحب منك الكلام .

انا بدي اعرف اذا قراري صح ولا لا اني اترك اختي وبيتها وابعد عنها والله بحس انه نفسيتي بتتعب بس ازورها وأشوف جوزها شو اعمل بهيك وضع ؟ احكي لا جوزي وانا عارفه انه جوزي رح ينصدم كثير ويمكن يعمل قصة كبيره.

رأي الباحث الاجتماعي:

لا يجب ترك زيارة اختك تحت اي ظرف كان، وزوج اختك لا تحكي معه ويجب على زوجك ان لا يتحدث مع احد بأي امور عائلية خاصة وقولي له انك سمعتي كلام من اختك عن حياتك الشخصية ما كان لازم يعرفها احد، انسي الموضوع واهم شيء لا يصير اي تواصل بينك وبين زوج اختك تحت اي ضرف كان، ونؤكد مرة اخرى لا تقطعي اختك أبداً واذا صار اي شيء في المستقبل قولي لابوكِ مش لزوجك، حتى يحميكِ انتي وأختك منه.

بعد زواجها ب 3 سنوات رنتلي

انا انس كنت بعلاقة مع ساره بعلاقة دامت سنتين بس علاقتنا ما كانت مستقرة كثير بسبب المشاكل وتركنا.

وبعدها بفترة قصيره تجوزت سارة وهذا الشيء صار جكر يمكن وراحت الأيام ونسيت كلشي واتاقلمت على الوضع بس بيوم رنتلي وانا انصدمت انه حكت معي بعد كل هالسنين وحكينا وطولنا بالمكالمة ورجعتني بمكالماتها لكلشي قديم وخلتني اتزكر واشتاق لأيامنا سوا سالتها سبب مكالمتها جاوبتني انك ما رحت عن بالي لحظه ودايما بفكر فيك واشتقتلك وهاد هو السبب مع العلم انه علاقتها مع جوزها منيحه وهي عايشه معه ببلد ثاني …

بس من بعد مكالمتها خلتني ارجع افكر فيها مثل قبل واشتاقلها بعرف هذا الشيء غلط بس مش عارف شو اعمل ؟؟

رأي الخبير الاجتماعي:

هي اخطات انها اتصلت معك، وانت لازم تملئ الفراغ العاطفي لديك بشخص اخر تحبه ويجب ان تتوقف عن التواصل معها لانها مرتاحة مع زوجها وليس من الصواب انك أتفكر فيها أبداً

تطلقت من زوجي

انا ساره حبيت انس لما كان عمري ١٤ سنة وهوابن خالتي وتركنا لما كان عمري ٢٢ سنه.

كان يتقدملي كثير ناس وكنت احكي لأنس بس كان ايخانقني علي انو ما بقدر يتزوجني لسا.

لما زوجوني اهلي طبعا انس ما قدر يعمل شي لانه ما كان وضعه سامح له انه يتقدملي وتركنا بنفس اليوم يلي تزوجت فيه.

وهلا صرلي سبعة سنوات متزوجه وما حكيت معه بكل هالفترا بس ما كان يروح من بالي يعني كنت لما اشوفو بأي مناسبه اتزكر أيامنا سوا واشتاقلو اكثر وكنت احلم فيه كل فترة من كثر ما افكر فيه ..

كان في مشاكل كثيره بيني وبين زوجي لدرجة كان يضربني أحياناً، وهالسبب ما خلاني انساه واقارن بينهم على طول واتندم كثير اني قبلت بالزواج وتسرعت وما صبرت على انس انه يكون حاله ويجي يتقدملي… ومن كثر ما يضربني ما تحملت وطلبت الطلاق وبعدها بفتره اجا انس وطلبني.

الان انا ما بدي أوافق على انس مش حابة واكيد عيلتنا بتعرف بحبنا القديم ورح يحكو اني أطلقت من زوجي علشان اتزوج انس، مع العلم ان زوجي بحاول ايرجعني علشان ابنه.

انا بحب انس كثير ومش عارفة شو اعمل؟

رأي الخبير الاجتماعي:

الان عليك ان تختاري بين عقلك وقلبك، اما ترجعي بشروطك ان يحترمك ولا يتعدى عليكي بالضرب لزوجك القديم، او تقبل كلام الناس والزواج من انس! بجميع الأحوال لابد ان تنتبهي على ان تتزوجي الإنسان الي بحبك لانه على الأغلب رح يكون حنون عليكي إنشاء الله ونتمنى ان يكون حنون على ابنك ولكن لن يكون حنون مثل ابيه.

بعد 11 سنة حب طلع متزوج

انا سارة عمري ٣٨ ولما تعرفت على انس وحبيته كان عمري ٢٧ سنة يعني من ١١ سنة وكان واعدني بالزواج. وبأسباب ضروفه كنت موافقة لأني بحبه.

كان الشخص يلي بتتمناه كل بنت بطريقة حبه الي وأسلوبه وكلامه وما كان مقصر معي بشي وكان عطول بهتم فيني ونادرا لحتى يصير بينا مشاكل هو كان الطرف الواعي بعلاقتنا كنت اثق فيه كثير ومعطيته كامل الثقه وما كنت ادور وراه بشي لانه عارفته ما بحب حد غيري ولا مرا رنتله وكان مشغول بالعكس ما كان في شي يخلني اشك انه حد خاين او ما بضحك علي.

بس كان كل جمعه ما يخليني ارنله عشان أهله وبكون مشغول معهم مرا على مرا حكيت بدي دور بصفحته على فيس وكان يوم جمعة وأشوف قرايبو وشو بنزل وشو بعلق ولقيت كومنت قديم معلق زوجتي ام سيف !!!!

هون عرفت انه متزوج وهون الصدمة القوية كانت! بس واجهت انس حكالي انا ما حكتلك لانه حبيتك وما بدي اخسرك وطلع عنده اربع اولاد وخمس بنات !!

انس أعطى رقمي لزوجته بعد ما اكتشفته لانه كان خايف منها رنتلي وبهدلتني وقالتلي مبروك عليكي مع اني ما بعرف وضعه ابدا وحكتلي انك مش اول علاقه بحياتو في غيرك كتير بنات ماسكتو بحكي مع اكثر من ٢٠ بنت غيري!!

قلت لأنس بس واجهته انت بحالك وانا بحالي ومستحيل اكون سبب خراب بيت زوجتك او اكون زوجة ثانية الك. وحتى لو الدين اعطاك انك تتزوج مثنى وثلاث ورباع انا مع الدين بس مستحيل اتزوج واحد كذب علي ١١ سنة وما رح اكون خطافة رجال.

اهلي عرفو بالموضوع وحكولي اتركيه هاد واحد كذاب

حاول يرجع ودخل ناس بالموضوع بس انا مستحيل احكي معه انه كذب علي سنين مع انه كان يجيني خطاب وانا كنت ارفض، بحتسب الموضوع عند الله.

زوجته موجوعه جداً وانفصلت عنه ورفعت عليه قضية شقاق ونزاع وأخذت الأولاد.

حبيت أشارك معكم تجربتي حتى الكل ينتبه وبكتفي بهذا القدر.

رأي الباحث الاجتماعي:

شكراً على المشاركة، استمري على موقفك لو كان فيه خير لكان الأولى زوجته ام أولاده.

يعني احنا بنوجه رسالة لجميع القراء ان دائماً في خطاء في اطالة العلاقات قبل الزواج، احذروا ودائماً ابحثوا عن السبب ولو تأخرت المدة اعرفوا انه لازم أتشوفي حل سريع لان عمرك بضيع منك.

لا انجب

انا ساره عمري ٢٧ سنة تزوجت انس بعد علاقة حب دامت سنة علاقتنا اول سنه زواج كانت ممتازه وما في اي اختلافات.

بعد السنه تغير انس معي كتير لدرجه يمر ايّام وما يحكي معي حرف واحد وحتى لو كنا على التخت ما بحكي معي وعلاقتنا صار فيها برود كتير وصار بخيل بكلشي بالمشاعر وبحبو الي وبطل يعطيني مصاري واذا طلبت بعصب علي وبخانقني و بس يكون معصب بضربني وبمنعني اطلع من البيت لحد فترا اكتشفت انه بحكي مع بنات وشفت شات بينه وبين بنت وقتها عرفت انه سبب تغيره معي وبس واجهتو حكالي انه نزوه وما رح يرجع يحكي وسامحته.

بعدها بفتره صار يعلق قبال اي حد اني ما عم جيب أولاد مع انه انا عملت فحوصات وتعالجت وكل أموري تمام وانس ما كان يقبل يروح معي على دكتور وتخانقنا بيوم ع هالقصه وضربني ورنيت على حماية الأسرة اجو أخذوني وودوني عند اهلي انا ما عملته اشي ايزعله وحكيتله احكيلي بشو قصرت معك قالي انس: انتي صرتي ملكي خلص! يعني انا صرت عنده زوجه بالبيت وخلص ما في اي داعي الدلع او اي اشي من هاد!

حاولت اقنع انس يجي معي على الدكتور علشان الحمل وما بقبل ، ما بعرف ليش والدكاترة ما بقبلو الا ان زوجي يجي معي بقولو انه لازم ايكون معك زوجك.

صار يحكيلي انه بدو يتزوج مرة ثانية علشان ايجيب أولاد.

وصار يضربني وكل اشي ايحطي فيني اذا خلص خزان المي بقول ان خلصت المي، وبصير ايصيح علي.

انا صارلي سنة عند اهلي زوجي مو راضي ايطلقني بدو ايخليني على ذمته وقاعد بدفعلي نفقة وكمان احيانا بدفع شهرين لقدام.

المهم انه أضل معلقة

لو اجا ايرجعني بوافق بس ايكون كويس معي.

كل ما المحكمة انتادينا مو راضي ايطلق صارلي سنتين على هذا الوقت وبسرعة بدفع النفقة.

شو اعمل؟

رأي الباحث الاجتماعي:

اذا تأخر الرجل بإمكانك استشارة محامي بقضية عدم الحصول على الحقوق الشرعية وانك قد لا تقيمين حدود الله، لا انصحك بالعودة اليه أبداً، ابدي حياة جديدة مع إنسان يحترمك ويقدرك.

ننتظر رأي القراء أيضاً

حبيبي اصغر مني ب 15 سنة

انا سارة عمري ٣٨ سنة وانس حبيبي عمرو٢٣ سنة وبنحب بعض كثير ومتعلقه فيو كثير بس الفرق بينا ١٥ سنة ! تعرفنا على بعض عن طريق الفيس بوك وانا ارملة وعندي أولاد.

انس حكا لاهلو عن علاقتنا وحكى معي اهلو بس ما حكالهم عن أولادي وانا كمان ما حكيتلهم اني ارملة وعندي أولاد وابني عمره ٢٢ سنة وفرق بينه وبين حبيبي سنة يعني من عمر ابني بس انا بحبو كتير وما بقدر اتركو ابدا ، وكل الناس رح توقف بطريقنا انك رح تاخدي واحد بعمر ابنك !! وما رح يتقلبو الفكره …. وخايفة من ردت فعل ابني انه ما يوافق.

أنا سارة برأي انه مثل ما الرجل يحق له ان يتزوج وحدة اصغر منه بكثير فانا كمان بحقلي.

وانا انس بحب سارة كثير وما بقدر ابعد عنها أبداً

رأي الباحث الاجتماعي:

سارة براي انا الرجل يحق له ان يتزوج ، بسيط الموضوع بكون ناوي ينجب هذا الرجل مثلاً، وتكوينية المرأة غير تكوينة الرجل لو الفرق صغير ممكن نتقبل الموضوع ولكن ليس من المنطق ان توخذي واحد من عمر ابنك وهذه العلاقة غير سوية ابدا وشو بكون رأي ابنك لو عرف !! ولازم نشغل عقلنا بهيك علاقه وما نركض ورا عواطفنا فعليا رح تلظمي انس ومن الأفضل ما تستمر ولو ارتبطتو و وافق الأهل ما رح تستمر علاقتكم لقدام.

أنس هذه العلاقة نهايتها الفشل بوجود كثير من النواقص ولا تنجر يا أنس وراء عواطفك، لا تنسى يا أنس ان الزواج لصنع أسرة.

شاركونا رأيكم في التعليقات